நாகப்பட்டினம் – இலங்கை காங்கேசன்துறை இடையிலான பயணிகள் கப்பல் சேவைக்கான கட்டணம் குறைக்கப்பட்டுள்ளதுடன், பயணிகள் 30 கிலோகிராம் வரையிலான பொருட்களை இலவசமாக எடுத்துச் செல்லவும் அனுமதி வழங்கப்பட்டுள்ளது.
இந்தியா – இலங்கை இடையிலான பயணிகள் கப்பல் சேவை கடந்த இரண்டரை ஆண்டுகளுக்கும் மேலாக முன்னெடுக்கப்பட்டு வருகின்றது. சுமார் 3 முதல் 4 மணிநேரம் பயணிக்கும் இந்தக் கப்பல், வாரத்தில் செவ்வாய்க்கிழமை தவிர்ந்த ஏனைய ஆறு நாட்களிலும் சேவையில் ஈடுபட்டு வருகின்றது.
இதுவரை நாகப்பட்டினத்திலிருந்து காங்கேசன்துறைக்குப் பயணிக்கும் ஒருவருக்கு 10 கிலோகிராம் வரையிலும், காங்கேசன்துறையிலிருந்து நாகப்பட்டினத்திற்குப் பயணிக்கும் ஒருவருக்கு 15 கிலோகிராம் வரையிலும் பொருட்களை இலவசமாக எடுத்துச் செல்ல அனுமதி வழங்கப்பட்டிருந்தது.
இந்நிலையில், பயணிகளின் கோரிக்கைக்கு அமைய பண்டிகைக் காலச் சலுகையாக ஒரு வழிப் பயணத்திற்கான கட்டணம் 6,000 இந்திய ரூபாவிலிருந்து 5,500 ரூபாவாகக் குறைக்கப்பட்டுள்ளது. அத்துடன், இரு திசைகளிலும் பயணிகள் 30 கிலோகிராம் வரையிலான பொருட்களை இலவசமாக எடுத்துச் செல்ல முடியும் என அறிவிக்கப்பட்டுள்ளது.
இது தொடர்பில் கப்பல் போக்குவரத்து நிறுவனத்தின் முதன்மை வணிக அலுவலர் சிவராம் நாகப்பட்டினத்தில் ஊடகங்களிடம் தெரிவிக்கையில், கடந்த இரண்டரை ஆண்டுகளில் ஆன்மிகம், சுற்றுலா மற்றும் வர்த்தக நோக்கங்களுக்காக இந்தியா – இலங்கை இடையே 55,310 பயணிகள் பயணம் செய்துள்ளதாகக் குறிப்பிட்டார்.
மேலும், வானிலை ஆய்வு மையத்தின் எச்சரிக்கைகள் விடுக்கப்படும் நாட்களைத் தவிர, ஏனைய அனைத்து நாட்களிலும் கப்பல் சேவையை முன்னெடுப்பதற்கான நடவடிக்கைகள் எடுக்கப்படும் என்றும் அவர் தெரிவித்தார்.
