உலகச் சந்தையில் கச்சா எண்ணெய் விலை தொடர்ந்து சரிவு!

இதன்படி, WTI ரக கச்சா எண்ணெய் பீப்பாய் ஒன்றின் விலை 90.59 அமெரிக்க டொலர்களாகக் குறைந்துள்ளது. இது முந்தைய வர்த்தகத்துடன் ஒப்பிடுகையில் 0.59 சதவீத வீழ்ச்சியாகும்.

அதேவேளை, பிரண்ட் ரக கச்சா எண்ணெய் பீப்பாய் ஒன்றின் விலை 97.31 அமெரிக்க டொலர்களாகப் பதிவாகியுள்ளது. இதன் விலையில் 1.06 சதவீத சரிவு ஏற்பட்டுள்ளது.

எனினும், மேர்பன் ரக கச்சா எண்ணெயின் விலை சிறியளவில் அதிகரித்து, பீப்பாய் ஒன்று 99.17 அமெரிக்க டொலர்களாகப் பதிவாகியுள்ளது.

மத்திய கிழக்கில் நிலவும் போர் பதற்றம் தணியக்கூடும் என்ற சந்தை எதிர்பார்ப்புகளே கச்சா எண்ணெய் விலைகளின் வீழ்ச்சிக்கு முக்கிய காரணமாகக் குறிப்பிடப்படுகின்றன.

குறிப்பாக, ஈரானுடனான மோதல்களை முடிவுக்குக் கொண்டுவருவதற்கான பேச்சுவார்த்தைகளில் முன்னேற்றம் ஏற்பட்டால், அந்நாட்டுக்கு எதிராகப் புதிய தாக்குதல்களை முன்னெடுக்க வேண்டிய அவசியம் இருக்காது என அமெரிக்க ஜனாதிபதி டொனால்ட் ட்ரம்ப் தெரிவித்துள்ளமை சந்தையில் தாக்கத்தை ஏற்படுத்தியுள்ளது.

இதன் காரணமாக, மத்திய கிழக்கில் போர் மோதல்கள் மேலும் தீவிரமடைவதற்கான சாத்தியம் குறையும் என்ற நம்பிக்கை முதலீட்டாளர்கள் மத்தியில் உருவாகியுள்ளதாகவும், இது கச்சா எண்ணெய் விலைகளில் சரிவை ஏற்படுத்தியுள்ளதாகவும் வெளிநாட்டு ஊடகங்கள் செய்தி வெளியிட்டுள்ளன.