பௌத்த தேரர்கள் தொடர்பான கவலைகள் மற்றும் நீதிபதிகளின் திடீர் இடமாற்றங்கள் குறித்து நாடாளுமன்றத்தில் விசேட விவாதங்களை நடத்துவதற்கு நடவடிக்கை எடுக்குமாறு ஸ்ரீலங்கா பொதுஜன பெரமுன (SLPP), எதிர்க்கட்சித் தலைவர் சஜித் பிரேமதாசவிடம் கோரிக்கை விடுத்துள்ளது.
இது தொடர்பாக எதிர்க்கட்சித் தலைவருக்கு அனுப்பியுள்ள கடிதத்தில், கட்சியின் பொதுச் செயலாளர் சட்டத்தரணி சாகர காரியவசம், தேசிய முக்கியத்துவம் வாய்ந்த இந்த இரண்டு விடயங்கள் குறித்தும் நாடாளுமன்றத்தில் விவாதம் நடத்தப்பட வேண்டியதன் அவசியத்தை வலியுறுத்தியுள்ளார்.
குறிப்பாக, பௌத்த மதகுருமாரைக் குறிவைத்து இடம்பெறுவதாகக் கூறப்படும் சம்பவங்கள், சில சட்ட அமலாக்க நிறுவனங்களின் செயற்பாடுகள் மற்றும் பௌத்த தேரர்களுக்கு எதிராக சமூக ஊடகங்களில் முன்னெடுக்கப்படும் பிரசாரங்கள் தொடர்பில் குறித்த கடிதத்தில் கவலை வெளியிடப்பட்டுள்ளது.
அத்துடன், தற்போதைய அரசாங்கத்துக்கு சாதகமற்ற தீர்ப்புகள் அல்லது உத்தரவுகளைப் பிறப்பித்த நீதிபதிகள் திடீரென இடமாற்றம் செய்யப்படுவது தொடர்பிலும் கேள்விகள் எழுப்பப்பட்டுள்ளன.
இவ்வாறான சம்பவங்கள் பொதுமக்கள் மத்தியில் பல்வேறு சந்தேகங்களையும் கவலைகளையும் தோற்றுவித்துள்ளதாக சாகர காரியவசம் சுட்டிக்காட்டியுள்ளார்.
நீதித்துறையின் சுயாதீனத்தன்மையையும் அதன் மீதான பொதுமக்களின் நம்பிக்கையையும் உறுதிப்படுத்துவதற்கு இந்த விடயங்கள் தொடர்பில் வெளிப்படையான விளக்கங்கள் வழங்கப்பட வேண்டியது அவசியம் என்றும் அவர் தெரிவித்துள்ளார்.
மேலும், எதிர்வரும் வரவு செலவுத் திட்ட விவாதங்களால் இந்த முக்கிய பிரச்சினைகள் தொடர்பான கவனம் திசைதிருப்பப்படலாம் எனக் குறிப்பிட்டுள்ள அவர், குறித்த இரண்டு விடயங்களையும் நாடாளுமன்ற விவாதத்துக்கு எடுத்துக்கொள்வதற்குத் தாமதமின்றி நடவடிக்கை எடுக்குமாறு சஜித் பிரேமதாசவிடம் கோரிக்கை விடுத்துள்ளார்.
