இலங்கையில் 18 வயது பூர்த்தியடைந்த அனைத்து குடிமக்களும் உள்நாட்டு இறைவரித் திணைக்களத்தில் (IRD) பதிவு செய்து வரி செலுத்துவோர் அடையாள எண்ணைப் (TIN) பெற்றுக்கொள்வது சட்டரீதியாகக் கட்டாயமாக்கப்பட்டுள்ள நிலையில், சுமார் 40 இலட்சம் பேர் இதுவரை அந்தப் பதிவை மேற்கொள்ளவில்லை எனத் திணைக்களம் தெரிவித்துள்ளது.
இது தொடர்பில் கருத்து வெளியிட்ட உள்நாட்டு இறைவரித் திணைக்கள ஆணையாளர் நந்தன குமார, இதுவரையில் சுமார் 1.3 கோடி பேர் TIN இலக்கத்தைப் பெற்றுள்ளதாகக் குறிப்பிட்டுள்ளார்.
இலங்கையில் 18 வயதுக்கு மேற்பட்டவர்களின் எண்ணிக்கை சுமார் 1.7 கோடியாக மதிப்பிடப்பட்டுள்ள நிலையில், எஞ்சியுள்ள 40 இலட்சம் பேரும் இதுவரை தமது பதிவுகளைப் பூர்த்தி செய்யவில்லை என அவர் சுட்டிக்காட்டியுள்ளார்.
முன்னதாக, குறிப்பிட்ட சில அரச மற்றும் நிதி சார்ந்த தேவைகளுக்காக மாத்திரமே TIN இலக்கம் பெற்றுக்கொள்வது அவசியமாக இருந்தது.
எனினும், தற்போதைய சட்ட ஏற்பாடுகளுக்கு அமைய 18 வயதைப் பூர்த்தி செய்துள்ள ஒவ்வொரு குடிமகனும் உள்நாட்டு இறைவரித் திணைக்களத்தில் பதிவு செய்து TIN இலக்கத்தைப் பெற்றுக்கொள்வது கட்டாயமாக்கப்பட்டுள்ளதாகவும் அவர் மேலும் தெரிவித்துள்ளார்.
