சர்வதேச கிரிக்கெட் போட்டிகளில் பங்கேற்கும் சம்மாந்துறை இளம் வீரர்கள்!

இந்தியாவில் நடைபெறவுள்ள சர்வதேச கிரிக்கெட் போட்டிகளில் இலங்கையைப் பிரதிநிதித்துவப்படுத்தவுள்ள சம்மாந்துறையைச் சேர்ந்த மூன்று இளம் வீரர்களுக்கு தலா 50 ஆயிரம் ரூபா நிதியுதவி வழங்க சம்மாந்துறை பிரதேச சபை தீர்மானித்துள்ளது.

இதன்படி, குறித்த மூன்று வீரர்களுக்கும் மொத்தமாக ஒரு இலட்சத்து 50 ஆயிரம் ரூபா நிதி ஒதுக்கீடு செய்யப்பட்டுள்ளது.

சம்மாந்துறை MUFO Cricket Academy-யைச் சேர்ந்த ஹம்தான், இஸ்பாக் மற்றும் சாஹித் ஆகிய மூன்று வீரர்களும் Riches Lanka Center for Cricket (RCC) ஊடாகத் தெரிவு செய்யப்பட்டு, இலங்கை RCC அணியில் விளையாடும் வாய்ப்பைப் பெற்றுள்ளனர்.

இவர்கள் இம்மாதம் இந்தியாவின் ஹரியானா மற்றும் டெல்லியில் நடைபெறவுள்ள சர்வதேச கிரிக்கெட் போட்டிகளிலும், 2027 ஜனவரியில் ஹைதராபாத்தில் நடைபெறவுள்ள போட்டிகளிலும் பங்கேற்கவுள்ளனர்.

குறித்த வீரர்களின் விளையாட்டு உபகரணங்கள் மற்றும் போக்குவரத்துச் செலவுகளுக்கு உதவி வழங்குமாறு MUFO விளையாட்டுக் கழகம் முன்வைத்த கோரிக்கை, சம்மாந்துறை பிரதேச சபையின் ஐந்தாவது கூட்டத்தொடரின் 17ஆவது அமர்வில் பரிசீலிக்கப்பட்டது.

தவிசாளர் ஐ.எல்.எம். மாஹிர் தலைமையில் நேற்று (10) நடைபெற்ற கூட்டத்தில், இளம் வீரர்களின் சர்வதேசப் போட்டிப் பங்கேற்பை ஊக்குவிக்கும் நோக்கில் நிதியுதவி வழங்குவதற்கான யோசனை முன்வைக்கப்பட்டது.

இதனைத் தொடர்ந்து, சபை உறுப்பினர்களின் ஆதரவுடன் மூன்று வீரர்களுக்கும் தலா 50 ஆயிரம் ரூபா வீதம் நிதி ஒதுக்கீடு செய்வதற்கான தீர்மானம் ஏகமனதாக நிறைவேற்றப்பட்டது.

இதேவேளை, அண்மைய பல்கலைக்கழக அனுமதித் தெரிவில் தொழில்நுட்பப் பிரிவில் மாவட்ட மட்டத்தில் முதலிரண்டு இடங்களைப் பெற்ற மாணவர்களைக் கௌரவிக்கவும் பிரதேச சபை தீர்மானித்துள்ளது.

அத்துடன், ஏனைய கல்விப் பிரிவுகளின் ஊடாகப் பல்கலைக்கழகங்களுக்கு அனுமதி பெற்ற மாணவர்களையும் பிரதேச சபைக்கு அழைத்து கௌரவிப்பதற்கான தீர்மானமும் எடுக்கப்பட்டுள்ளது.

விளையாட்டுத் துறையில் சர்வதேச மட்டத்தில் சாதிக்க முயற்சிக்கும் இளம் வீரர்களுக்கும், கல்வியில் சிறந்து விளங்கும் மாணவர்களுக்கும் ஊக்கமளிக்கும் வகையில் சம்மாந்துறை பிரதேச சபை இந்த நடவடிக்கைகளை முன்னெடுத்துள்ளமை குறிப்பிடத்தக்கது.