மட்டக்களப்பு மாவட்டத்தில் மதுபானம் மற்றும் போதைப்பொருள் பாவித்துவிட்டு வாகனம் செலுத்தும் சாரதிகளைக் கண்டறியும் நோக்கில் விசேட நடமாடும் மருத்துவப் பரிசோதனை நடவடிக்கை இன்று (11) முன்னெடுக்கப்பட்டு வருகிறது.
மட்டக்களப்பு மாவட்ட போக்குவரத்துப் பொலிஸாரும் தேசிய போக்குவரத்து மருத்துவ நிறுவகமும் இணைந்து இந்த நடவடிக்கையை முன்னெடுத்து வருகின்றன.
தொடர்ச்சியாக இடம்பெற்று வரும் வீதி விபத்துக்களைக் கட்டுப்படுத்தி, உயிரிழப்புகளைக் குறைக்கும் நோக்கில் இந்த விசேட திட்டம் செயல்படுத்தப்படுவதாக மட்டக்களப்பு மாவட்ட போக்குவரத்துப் பொலிஸ் பிரிவின் பொறுப்பதிகாரி பொலிஸ் பரிசோதகர் குணதிலக்க தெரிவித்துள்ளார்.
இதற்கமைய, மட்டக்களப்பு நகரின் முக்கிய சந்திகளில் போக்குவரத்துப் பொலிஸார் கடமையில் ஈடுபடுத்தப்பட்டு, வீதிகளில் பயணிக்கும் மோட்டார் சைக்கிள்கள் முதல் கனரக வாகனங்கள் வரையிலான வாகனங்கள் நிறுத்தப்பட்டு சாரதிகள் மருத்துவப் பரிசோதனைக்கு உட்படுத்தப்பட்டு வருகின்றனர்.
இதற்காக தேசிய போக்குவரத்து மருத்துவ நிறுவகத்தின் நடமாடும் மருத்துவப் பரிசோதனைப் பேருந்து மட்டக்களப்பு பிரதான பேருந்து நிலையத்திற்கு அருகில் நிறுத்தப்பட்டுள்ளது.
இதன்போது, இலங்கை போக்குவரத்துச் சபை மற்றும் தனியார் பேருந்துகளின் சாரதிகள், வேன் சாரதிகள், கனரக வாகன சாரதிகள், முச்சக்கரவண்டி மற்றும் மோட்டார் சைக்கிள் ஓட்டுநர்கள் உள்ளிட்ட பல்வேறு வாகன சாரதிகளும் பரிசோதனைக்கு உட்படுத்தப்படுகின்றனர்.
சாரதிகளிடமிருந்து மாதிரிகள் பெறப்பட்டு உடனடியாகப் பரிசோதனை மேற்கொள்ளப்படுவதுடன், அவர்கள் மதுபானம் அல்லது போதைப்பொருள் பயன்படுத்தியுள்ளார்களா என்பதும் கண்டறியப்பட்டு வருகிறது.
வீதி விபத்துக்களைத் தடுக்கும் வகையிலும், பொதுமக்களின் பாதுகாப்பான பயணத்தை உறுதிப்படுத்தும் நோக்கிலும் இவ்வாறான விசேட சோதனை நடவடிக்கைகள் முன்னெடுக்கப்பட்டு வருகின்றமை குறிப்பிடத்தக்கது.
