சுற்றுலா விசா (Visit Visa) மூலம் வெளிநாடுகளுக்குச் சென்று வேலை தேடுவதைத் தவிர்க்குமாறு வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலா அமைச்சு இலங்கையர்களுக்கு எச்சரிக்கை விடுத்துள்ளது.
குறிப்பாக மலேசியா, டுபாய் மற்றும் ஓமான் உள்ளிட்ட நாடுகளில் வேலை பெற்றுத் தருவதாகக் கூறப்படும் போலி வாக்குறுதிகளை நம்பி சுற்றுலா விசாவில் செல்லும் பல இலங்கையர்கள் பல்வேறு சிரமங்களை எதிர்கொள்வதாக அமைச்சு சுட்டிக்காட்டியுள்ளது.
இவ்வாறு செல்வோருக்கு எதிர்பார்த்த வேலை மற்றும் சம்பளம் கிடைக்காமை, மோசடி, மனிதக் கடத்தல், கைது, நாடு கடத்தல் மற்றும் பண இழப்பு போன்ற ஆபத்துகள் ஏற்படக்கூடும் என எச்சரிக்கப்பட்டுள்ளது.
எனவே, சுற்றுலா விசாவை தொழில் விசாவாக மாற்றித் தருவதாகக் கூறும் போலி வாக்குறுதிகளை நம்ப வேண்டாம் என்றும், வெளிநாட்டு வேலைவாய்ப்புக்குச் செல்வோர் இலங்கை வெளிநாட்டு வேலைவாய்ப்புப் பணியகத்தில் முறையாகப் பதிவு செய்து சட்டப்பூர்வ நடைமுறைகளைப் பின்பற்றுமாறும் அமைச்சு வலியுறுத்தியுள்ளது.
