நீண்டகாலமாகப் பொருளாதார மற்றும் சமூக ரீதியாகப் பாதிக்கப்பட்டுள்ள நாட்டை ஒரே இரவில் மாற்றியமைக்க முடியாது என கைத்தொழில் மற்றும் தொழில்முயற்சி மேம்பாட்டு அமைச்சர் சுனில் ஹதுன்னெத்தி தெரிவித்துள்ளார்.
நாட்டை நிர்வகிப்பதும், அபிவிருத்திப் பணிகளை முன்னெடுப்பதும் எவ்வளவு கடினமானது என்பதை ஆட்சிப் பொறுப்பில் இருப்பவர்களே நன்கு அறிந்திருப்பதாகவும் அவர் சுட்டிக்காட்டியுள்ளார்.
மாத்தறையில் நேற்று (11) நடைபெற்ற நிகழ்வொன்றில் உரையாற்றிய அமைச்சர், தற்போதைய பொருளாதாரச் சூழலில் சாதாரண வீதியொன்றைச் சீரமைப்பதற்குத் தேவையான தார் உள்ளிட்ட மூலப்பொருட்களைப் பெற்றுக்கொள்வதிலும் பாரிய சிரமங்கள் காணப்படுவதாகக் குறிப்பிட்டார்.
அரசாங்கத்தின் இரண்டு ஆண்டுகால செயற்பாடுகள் குறித்து எழுப்பப்படும் விமர்சனங்களுக்குப் பதிலளித்த அவர், 76 ஆண்டுகளாகச் சீர்குலைந்த பொருளாதாரத்தையும் சமூகக் கட்டமைப்பையும் பொறுப்பேற்றுள்ள அரசாங்கம், குறுகிய காலத்தில் அனைத்து பிரச்சினைகளுக்கும் தீர்வு காணும் என எதிர்பார்ப்பது யதார்த்தமற்றது எனத் தெரிவித்தார்.
மேலும், எந்தவொரு பணியையும் நேரடியாகச் செய்து பார்க்கும்போதே அதிலுள்ள சவால்களையும் சிரமங்களையும் உணர முடியும் என்றும், எவ்வித பொறுப்புகளையும் ஏற்காமல் விமர்சனங்களை முன்வைப்பது இலகுவானது என்றும் அவர் குறிப்பிட்டார்.
நாட்டின் பொருளாதார நிலைமை, அரச நிதி நெருக்கடி மற்றும் அபிவிருத்திப் பணிகளுக்குத் தேவையான வளங்களின் பற்றாக்குறை உள்ளிட்ட பல்வேறு சவால்களுக்கு மத்தியில் அரசாங்கம் தனது செயற்பாடுகளை முன்னெடுத்து வருவதாகவும் அமைச்சர் மேலும் வலியுறுத்தியுள்ளார்.
