இலங்கையில் 2026ஆம் ஆண்டின் இதுவரையான காலப்பகுதியில் உயிரிழப்புகளை ஏற்படுத்திய 2,257 வீதி விபத்துக்கள் பதிவாகியுள்ளதுடன், அவற்றில் மொத்தமாக 2,381 பேர் உயிரிழந்துள்ளதாக பொலிஸ் ஊடகப் பேச்சாளர் பிரதிப் பொலிஸ்மா அதிபர் எப்.யூ. வூட்லர் தெரிவித்துள்ளார்.
ஊடகங்களுக்கு கருத்துத் தெரிவிக்கும் போதே அவர் இந்தத் தகவல்களை வெளியிட்டுள்ளார்.
நாட்டில் அதிகரித்து வரும் வீதி விபத்து மரணங்கள் தொடர்பில் கவலை வெளியிட்ட அவர், அதிக வேகத்தில் வாகனங்களைச் செலுத்துதல் மற்றும் சாரதிகளின் கவனயீனம் ஆகியன இவ்வாறான விபத்துக்களுக்கு முக்கிய காரணங்களாக அமைவதாகக் குறிப்பிட்டார்.
இந்த ஆண்டு வீதி விபத்துக்களில் உயிரிழந்தவர்களில் 785 பேர் மோட்டார் சைக்கிள் சாரதிகள் என்பதுடன், 227 பேர் பாதசாரிகள் எனவும் அவர் சுட்டிக்காட்டினார்.
மேலும், இலங்கையில் தற்போது சுமார் 60 இலட்சம் பதிவு செய்யப்பட்ட மோட்டார் சைக்கிள்கள் பயன்பாட்டில் இருப்பதாகத் தெரிவித்த அவர், குறிப்பாக இளம் சாரதிகள் அபாயகரமான முறையில் வாகனங்களைச் செலுத்துவதால் எதிர்கொள்ளக்கூடிய ஆபத்துக்கள் குறித்தும் எச்சரிக்கை விடுத்தார்.
அதிவேகம் மற்றும் பொறுப்பற்ற வீதிப் பயன்பாடு உயிரிழப்புகளுக்கு வழிவகுக்கும் என்பதால், வீதி விதிமுறைகளைப் பின்பற்றுவதில் அனைவரும் அதிக கவனம் செலுத்த வேண்டும் என்றும் அவர் வலியுறுத்தினார்.
அதேவேளை, தமது பிள்ளைகளுக்கு மோட்டார் சைக்கிள்களை வாங்கிக் கொடுக்கும் பெற்றோர், அவர்களின் வயது, வாகனம் செலுத்தும் திறன் மற்றும் பாதுகாப்பு தொடர்பில் உரிய கவனம் செலுத்த வேண்டும் என்றும் பொலிஸ் ஊடகப் பேச்சாளர் கேட்டுக்கொண்டார்.
