சவூதி அரேபியாவை இலக்காகக் கொண்டு ஹூதிகள் முன்னெடுத்து வரும் ஏவுகணை மற்றும் ஆளில்லா விமானத் தாக்குதல் அச்சுறுத்தல்களைத் தொடர்ந்து, பல சர்வதேச விமான நிறுவனங்கள் அந்நாட்டுக்கான விமானச் சேவைகளைத் தற்காலிகமாக இடைநிறுத்தியுள்ளன.
பாதுகாப்பு நிலைமை தொடர்பான அச்சுறுத்தல்களைக் கருத்திற்கொண்டு, ரியாத் மற்றும் ஜித்தா நகரங்களுக்கான விமானச் சேவைகளை நவம்பர் 30ஆம் திகதி வரை நிறுத்தி வைப்பதாக இந்தியாவின் அகசா ஏர் நிறுவனம் அறிவித்துள்ளது.
அதேபோன்று, இண்டிகோ விமான நிறுவனம் ரியாத் மற்றும் தம்மாம் நகரங்களுக்கான சேவைகளை நவம்பர் 30ஆம் திகதி வரையும், ஜித்தா மற்றும் மதீனாவுக்கான விமானச் சேவைகளை நவம்பர் 21ஆம் திகதி வரையும் இரத்து செய்துள்ளது.
மேலும், ஏர் இந்தியா மற்றும் ஏர் இந்தியா எக்ஸ்பிரஸ் நிறுவனங்கள் ரியாத், ஜித்தா மற்றும் தம்மாம் நகரங்களுக்கான விமானச் சேவைகளை நவம்பர் 14ஆம் திகதி வரை இடைநிறுத்தியுள்ளன.
ஐரோப்பிய விமான நிறுவனங்களும் தமது சேவைகளை இடைநிறுத்தும் காலத்தை நீடித்துள்ளன. இதன்படி, KLM நிறுவனம் ரியாத் மற்றும் தம்மாம் நகரங்களுக்கான விமானச் சேவைகளை நவம்பர் 27ஆம் திகதி வரை இரத்து செய்துள்ளது.
பிரிட்டிஷ் ஏர்வேஸ் தனது லண்டன் – ரியாத் விமானச் சேவையை மீண்டும் ஆரம்பிக்கும் திகதியை 2027 ஜனவரி 11ஆம் திகதி வரை ஒத்திவைத்துள்ளது.
இதேவேளை, ஐக்கிய அரபு அமீரகத்தின் எதிஹாட் ஏர்வேஸ் நிறுவனம் ரியாத் மற்றும் தம்மாம் நகரங்களுக்கான விமானச் சேவைகளை நவம்பர் 19ஆம் திகதி வரை நிறுத்தியுள்ளதுடன், ஓமானின் சலாம்ஏர் நிறுவனம் இவ்விரு நகரங்களுக்கான சேவைகளை நவம்பர் 30ஆம் திகதி வரை இரத்து செய்துள்ளது.
சவூதி அரேபியாவின் கிங் காலித் சர்வதேச விமான நிலையம் உள்ளிட்ட விமான நிலையங்கள், எரிசக்தி மையங்கள் மற்றும் முக்கிய உட்கட்டமைப்புகளை இலக்காகக் கொண்டு நடத்தப்பட்டதாகக் கூறப்படும் தாக்குதல்களே இந்த விமானப் போக்குவரத்து இடையூறுகளுக்குக் காரணமாக அமைந்துள்ளதாகத் தெரிவிக்கப்படுகிறது.
இதனால் சவூதி அரேபியாவுக்குச் செல்லும் மற்றும் அங்கிருந்து பயணிக்கும் சர்வதேசப் பயணிகள் பாதிக்கப்பட்டுள்ளனர்.
