மட்டக்களப்பு இராமகிருஷ்ண மிஷனின் வரலாற்றுச் சிறப்புமிக்க நூற்றாண்டு நிறைவு விழாவை (1926 – 2026) முன்னிட்டு, உலகளாவிய இராமகிருஷ்ண மடம் மற்றும் இராமகிருஷ்ண மிஷனின் உப-தலைவர் அதிவணக்கத்திற்குரிய ஸ்ரீமத் சுவாமி சுஹிதானந்தஜி மகராஜ் அவர்களுக்கு இன்று (12.11.2026) மாலை மட்டக்களப்பில் மிகுந்த பக்திபூர்வமான முறையில் உற்சாக வரவேற்பு அளிக்கப்பட்டது.
மட்டக்களப்பு இராமகிருஷ்ண மிஷனின் நூற்றாண்டு கால ஆன்மீக, கல்வி மற்றும் சமூகப் பணிகளைப் போற்றும் வகையில் ஏற்பாடு செய்யப்பட்டுள்ள நூற்றாண்டு நிறைவு விழா நிகழ்வுகளில் கலந்துகொள்வதற்காக, அதிவணக்கத்திற்குரிய ஸ்ரீமத் சுவாமி சுஹிதானந்தஜி மகராஜ் அவர்கள் இன்றைய தினம் மட்டக்களப்பிற்கு வருகை தந்துள்ளார்.
எதிர்வரும் நவம்பர் 18-ஆம் திகதி வரை (12.11.2026 முதல் 18.11.2026 வரை) அவர் மட்டக்களப்பில் தங்கியிருந்து பல்வேறு ஆன்மீக நிகழ்வுகளிலும், நூற்றாண்டு விழா வைபவங்களிலும் கலந்துகொண்டு ஆசியுரை வழங்கவுள்ளார். நேற்று மாலை நடைபெற்ற வரவேற்பு நிகழ்வில், மட்டக்களப்பு இராமகிருஷ்ண மிஷன் சுவாமிஜீக்கள், பக்தர்கள், பொதுமக்கள் எனப் பெருந்திரளானோர் கலந்துகொண்டு சுவாமிஜீ அவர்களை வரவேற்றனர்.
குறிப்பாக, மட்டக்களப்பு சைவ மங்கையர் கழகம் மற்றும் இந்திய தீர்த்த யாத்திரைக் குழுவினர் உள்ளிட்ட பல்வேறு ஆன்மீக மற்றும் சமூக அமைப்புகள் தமது வாழ்த்துக்களையும் வரவேற்பினையும் பதாகைகள் வாயிலாகவும் நேரடியாகவும் வெளிப்படுத்தியிருந்தமை குறிப்பிடத்தக்கது.
1926-ஆம் ஆண்டு ஆரம்பிக்கப்பட்டு, கடந்த ஒரு நூற்றாண்டு காலமாகக் கிழக்கு மாகாண மக்களின் கல்வி, கலாசாரம் மற்றும் ஆன்மீக மேம்பாட்டிற்கு அளப்பரிய சேவையாற்றி வரும் மட்டக்களப்பு இராமகிருஷ்ண மிஷனின் நூற்றாண்டு நிறைவு விழா, பிரதேச மக்களிடையே பெரும் எழுச்சியையும் ஆன்மீக உத்வேகத்தையும் ஏற்படுத்தியுள்ளது.
