2027ஆம் ஆண்டுக்கான வரவு செலவுத் திட்ட முன்மொழிவின் கீழ், 18 வயதுக்கு மேற்பட்ட தரம் 13 மாணவர்கள் கொழும்பு பங்குச் சந்தையில் (CSE) முதலீடு செய்வதற்கான வாய்ப்பு வழங்கப்படவுள்ளது.
கொழும்பு பங்குச் சந்தையின் சந்தைப்படுத்தல் பிரிவு உதவி முகாமையாளர் நிரோஷன் விஜயசுந்தர இதனைத் தெரிவித்துள்ளார்.
இதற்கமைய, கொழும்பு பங்குச் சந்தையினால் அறிமுகப்படுத்தப்படும் பயிற்சிப் பாடநெறியைப் பூர்த்தி செய்து, அதற்கான பரீட்சையில் சித்தியடையும் ஒவ்வொரு மாணவருக்கும் 10,000 ரூபா பெறுமதியான முதலீட்டு வாய்ப்பு வழங்கப்படவுள்ளது.
இத்திட்டத்தை நடைமுறைப்படுத்துவதற்காக 500 மில்லியன் ரூபா நிதி ஒதுக்கீடு செய்யப்பட்டுள்ளதுடன், நகர்ப்புற மாணவர்கள் மட்டுமன்றி கிராமப்புற மற்றும் பின்தங்கிய பாடசாலை மாணவர்களுக்கும் இவ்வாய்ப்பை வழங்க நடவடிக்கை எடுக்கப்படவுள்ளது.
மாணவர்களிடையே பங்குச் சந்தை தொடர்பான அறிவையும் நிதிசார் கல்வியறிவையும் மேம்படுத்தி, எதிர்காலத்தில் தொழில்முனைவோர்களாக உருவாகுவதற்கு ஊக்கமளிப்பதே இத்திட்டத்தின் நோக்கம் எனவும் தெரிவிக்கப்பட்டுள்ளது.
