காலி, கராப்பிட்டியவில் அமைந்துள்ள ருஹுணு பல்கலைக்கழக மருத்துவ பீடத்தின் 10 மாடிகளைக் கொண்ட புதிய நவீன மருத்துவக் கட்டிடம் சுகாதார அமைச்சர் வைத்தியர் நளிந்த ஜயதிஸ்ஸவினால் உத்தியோகபூர்வமாகத் திறந்து வைக்கப்பட்டுள்ளது.
300 கட்டில்களைக் கொண்ட இந்தக் கட்டிடத்தில் மருத்துவம், சத்திரசிகிச்சை, உளவியல் மற்றும் மகப்பேறியல் பிரிவுகள் அமைக்கப்பட்டுள்ளன.
அத்துடன், 8 கட்டில்களைக் கொண்ட தீவிர சிகிச்சைப் பிரிவு, மூன்று நவீன சத்திரசிகிச்சை கூடங்கள், எட்டு வெளிநோயாளர் ஆலோசனை அறைகள் மற்றும் மருத்துவப் பரிசோதனை மண்டபம் உள்ளிட்ட வசதிகளும் ஏற்படுத்தப்பட்டுள்ளன.
உயர்கல்வி மற்றும் சுகாதார அமைச்சுக்களின் ஒத்துழைப்புடன் முன்னெடுக்கப்பட்ட இந்தத் திட்டத்திற்கு பல்வேறு நன்கொடையாளர்களும் பங்களிப்பு வழங்கியுள்ளனர்.
இந்தக் கட்டிடத்தின் திறப்பு விழாவில் உரையாற்றிய அமைச்சர், சுகாதார சேவையின் உட்கட்டமைப்பு வசதிகளை மேலும் மேம்படுத்த அரசாங்கம் நடவடிக்கை எடுத்து வருவதாகத் தெரிவித்தார்.







