இலங்கையின் இளம் விளையாட்டு வீரர்களை எதிர்கால ஒலிம்பிக் போட்டிகளுக்குத் தயார்படுத்தும் நோக்கிலேயே அரசாங்கத்தின் நீண்டகால விளையாட்டு அபிவிருத்தித் திட்டம் முன்னெடுக்கப்படுவதாக நாடாளுமன்ற உறுப்பினர் நஜித் இந்திக்க தெரிவித்துள்ளார்.
இந்தத் திட்டம் தொடர்பில் எதிர்க்கட்சியினர் முன்வைக்கும் விமர்சனங்களுக்குப் பதிலளித்த அவர், 2027ஆம் ஆண்டு ஒலிம்பிக் போட்டிகள் நடைபெறாது என்பது அரசாங்கத்துக்கும் தெரியும் எனக் குறிப்பிட்டார்.
“2027ஆம் ஆண்டு ஒலிம்பிக் போட்டிகள் நடைபெறாது என்பது எமக்கும் தெரியும். அது அனைவருக்கும் தெரிந்த விடயம்தான்” என அவர் மக்கள் சந்திப்பொன்றில் உரையாற்றும்போது தெரிவித்தார்.
இந்தத் திட்டம் குறுகிய கால நோக்கத்தைக் கொண்டதல்ல என்றும், குறைந்தபட்சம் அடுத்த ஐந்து ஆண்டுகளுக்கு இளம் விளையாட்டு வீரர்களை முறையாகப் பயிற்றுவித்து, எதிர்கால ஒலிம்பிக் போட்டிகளில் பதக்கங்களை வெல்லக்கூடிய வகையில் அவர்களைத் தயார்படுத்துவதே இதன் நோக்கம் என்றும் அவர் விளக்கினார்.
எதிர்க்கட்சிகளின் விமர்சனங்களுக்குப் பதிலளித்த அவர், அடுத்த ஒலிம்பிக் போட்டிகள் நடைபெறும்போது இலங்கை வீரர்கள் சிறந்த முறையில் தயாராக இருப்பதை உறுதிப்படுத்தும் கட்டமைக்கப்பட்ட விளையாட்டு அபிவிருத்தித் திட்டத்தை உருவாக்குவதே அரசாங்கத்தின் இலக்கு எனத் தெரிவித்தார்.
2027ஆம் ஆண்டுக்கான வரவு செலவுத் திட்டத்தில் ஜனாதிபதி அநுரகுமார திஸாநாயக்க முன்வைத்த முன்மொழிவைத் தொடர்ந்து இந்த விவாதம் எழுந்துள்ளது.
இதன்படி, ஒலிம்பிக் போட்டிகள் மற்றும் உலக மெய்வல்லுநர் சம்பியன்ஷிப் போட்டிகளில் தங்கப் பதக்கம் வெல்லும் இலங்கை வீரர்களுக்கு 100 மில்லியன் ரூபா பரிசுத் தொகை வழங்க முன்மொழியப்பட்டுள்ளது.
மேலும், பொதுநலவாய விளையாட்டுப் போட்டிகளில் தங்கப் பதக்கம் வெல்பவர்களுக்கு 75 மில்லியன் ரூபாவும், ஆசிய விளையாட்டுப் போட்டிகளில் தங்கப் பதக்கம் வெல்பவர்களுக்கு 50 மில்லியன் ரூபாவும், சார்க் விளையாட்டுப் போட்டிகளில் தங்கப் பதக்கம் வெல்பவர்களுக்கு 15 மில்லியன் ரூபாவும் வழங்க முன்மொழியப்பட்டுள்ளது.







