வங்காள விரிகுடாவில் உருவாகியுள்ள ‘அக்வான்’ (Akvan) தீவிர சூறாவளிப் புயல் காரணமாக, மேற்கு மத்திய வங்காள விரிகுடா கடற்பரப்பில் பலத்த காற்றுடன் கூடிய கொந்தளிப்பான கடல் நிலைமை ஏற்படக்கூடும் என நீண்டநாள் மீன்பிடிப் படகுகளுக்கு வளிமண்டலவியல் திணைக்களம் சிவப்பு எச்சரிக்கை விடுத்துள்ளது.
இன்று (18) பிற்பகல் 3.00 மணிக்கு வெளியிடப்பட்ட இந்த எச்சரிக்கை, நாளை (19) பிற்பகல் 3.00 மணி வரை அமுலில் இருக்கும்.
தெற்கு மற்றும் மேற்கு மத்திய வங்காள விரிகுடா பகுதிகளில் உருவான இந்தப் புயல், இன்று முற்பகல் 11.30 மணியளவில் திருகோணமலையிலிருந்து சுமார் 680 கிலோமீற்றர் தொலைவில் நிலைகொண்டிருந்தது.
இந்தப் புயல் வடமேற்கு திசையில் நகர்ந்து, எதிர்வரும் நவம்பர் 20ஆம் திகதி காலை 11.30 மணியளவில் இந்தியாவின் ஆந்திரப் பிரதேசக் கடற்கரையில் நெல்லூர் மற்றும் விசாகப்பட்டினம் இடையே கரையைக் கடக்கும் என எதிர்பார்க்கப்படுகிறது.
இதனால், வட அகலாங்கு 10° முதல் 20° வரையிலும், கிழக்கு நெட்டாங்கு 80° முதல் 95° வரையிலுமான கடற்பரப்புகளில் மறு அறிவித்தல் வரை மீன்பிடி மற்றும் கடற்றொழில் நடவடிக்கைகளில் ஈடுபடுவதைத் தவிர்க்குமாறு அறிவுறுத்தப்பட்டுள்ளது.
மேலும், குறித்த கடற்பரப்புகளில் ஏற்கனவே மீன்பிடி மற்றும் கடல்சார் நடவடிக்கைகளில் ஈடுபட்டுள்ளவர்கள் பாதுகாப்பான இடங்களுக்குச் செல்லுமாறும், வளிமண்டலவியல் திணைக்களத்தின் எதிர்கால அறிவித்தல்களை அவதானிக்குமாறும் அறிவுறுத்தப்பட்டுள்ளனர்.







