யாழ்ப்பாணப் பல்கலைக்கழகத்தில் சக மாணவர்கள் மீது தாக்குதல் நடத்தி, பிளேட்டினால் வெட்டுக்காயங்களை ஏற்படுத்திய சம்பவம் தொடர்பில் கைது செய்யப்பட்ட 21 மாணவர்களையும் எதிர்வரும் 26ஆம் திகதி வரை விளக்கமறியலில் வைக்குமாறு நீதிமன்றம் உத்தரவிட்டுள்ளது.
யாழ்ப்பாணப் பல்கலைக்கழகத்தின் முகாமைத்துவ பீடத்தைச் சேர்ந்த ஐந்து மாணவர்கள் மீது, கடந்த 19ஆம் திகதி இரவு சக மாணவர்கள் குழுவொன்று இணைந்து தாக்குதல் நடத்தியுள்ளது.
இதன்போது, குறித்த மாணவர்கள் மீது மூர்க்கமாகத் தாக்குதல் நடத்தப்பட்டதுடன், பிளேட்டினால் வெட்டுக்காயங்களும் ஏற்படுத்தப்பட்டுள்ளன.
சம்பவத்தில் காயமடைந்த ஐந்து மாணவர்களும் சிகிச்சைக்காக யாழ்ப்பாணம் போதனா வைத்தியசாலையில் அனுமதிக்கப்பட்டுள்ளனர்.

சம்பவம் தொடர்பில் கிடைத்த முறைப்பாட்டின் அடிப்படையில் விசாரணைகளை முன்னெடுத்த கோப்பாய் பொலிஸார், தாக்குதல் நடத்தி காயம் ஏற்படுத்திய குற்றச்சாட்டில் ஒருவரையும், பொது இடத்தில் மோதலில் ஈடுபட்ட குற்றச்சாட்டில் மேலும் 20 பேரையும் கைது செய்தனர்.
இவ்வாறு கைது செய்யப்பட்ட 21 மாணவர்களும் நீதிமன்றத்தில் ஆஜர்படுத்தப்பட்டதைத் தொடர்ந்து, அவர்களை எதிர்வரும் 26ஆம் திகதி வரை விளக்கமறியலில் வைக்குமாறு யாழ்ப்பாணம் நீதவான் நீதிமன்றம் உத்தரவிட்டுள்ளது.
இதேவேளை, குறித்த குழு மோதலில் தொடர்புடைய ஏனைய மாணவர்களையும் கைது செய்வதற்கான நடவடிக்கைகளை பொலிஸார் முன்னெடுத்து வருகின்றனர்.







