நிர்வாகம், மாகாண சபைகள் மற்றும் உள்ளூராட்சி அமைச்சினால் 2026 ஆம் ஆண்டுக்கான புனித ரமழான் காலப்பகுதியில் முஸ்லிம் அரச உத்தியோகத்தர்களுக்கான விசேட ஏற்பாடுகள் குறித்த சுற்றுநிரூபம் வெளியிடப்பட்டுள்ளது.
எதிர்வரும் 2026 ஆம் ஆண்டு ரமழான் பருவம் பெப்ரவரி 19 அன்று ஆரம்பமாகி மார்ச் 21 அன்று முடிவடையும் என எதிர்பார்க்கப்படுவதாக குறித்த சுற்றுநிரூபத்தில் தெரிவிக்கப்பட்டுள்ளது. இக்காலப்பகுதியில் முஸ்லிம் உத்தியோகத்தர்கள் தங்களது தொழுகைகள் மற்றும் மத வழிபாடுகளில் ஈடுபடுவதற்குத் தேவையான வசதிகளைச் செய்து கொடுக்குமாறு நிறுவனத் தலைவர்களுக்கு அறிவுறுத்தப்பட்டுள்ளது.
மத வழிபாடுகள் நடைபெறும் நேரங்களாக அமைச்சினால் பின்வரும் காலப்பகுதிகள் அடையாளம் காணப்பட்டுள்ளன.
முற்பகல் 3.30 முதல் முற்பகல் 6.00 வரை
பிற்பகல் 3.15 முதல் பிற்பகல் 4.15 வரை
பிற்பகல் 6.00 முதல் இரவு 7.00 வரை
இரவு 7.30 முதல் இரவு 10.30 வரை
முக்கிய வழிகாட்டல்கள்;
பணி மாற்றங்கள் (Shifts): இந்த மத வழிபாடுகளில் உத்தியோகத்தர்கள் கலந்துகொள்வதற்கு ஏதுவாக, இயலுமானவரை பணி நேரங்களை (Shifts) மாற்றி அமைக்குமாறு நிறுவனங்கள் அறிவுறுத்தப்பட்டுள்ளன.
விசேட விடுமுறை: பணி மாற்றங்களைச் செய்ய முடியாத தவிர்க்க முடியாத சூழ்நிலைகளில் மட்டுமே விசேட விடுமுறை வழங்கப்பட வேண்டும் என அந்த சுற்றுநிரூபத்தில் குறிப்பிடப்பட்டுள்ளது.
உற்சவ முற்பணம் (Festival Advance): பொதுச் சேவை, அரச கூட்டுத்தாபனங்கள் மற்றும் விதிகளுக்கமைய அமைக்கப்பட்ட சபைகளில் (Statutory Boards) பணியாற்றும் தகுதியுள்ள முஸ்லிம் உத்தியோகத்தர்களுக்கு, ரமழான் காலம் முடிவடைவதற்கு குறைந்தது 14 நாட்களுக்கு முன்னதாக உற்சவ முற்பணம் வழங்கப்படுவதை உறுதி செய்யுமாறு சம்பந்தப்பட்ட அதிகாரிகளுக்கு அமைச்சு பணிப்புரை விடுத்துள்ளது.
