நாடாளுமன்றத்தில் எதிர்க்கட்சித் தலைவர் சஜித் பிரேமதாச தன் மீது சுமத்திய குற்றச்சாட்டுகளைப் பிரதி அமைச்சர் நலின் ஹேவகே இன்று (20) நாடாளுமன்ற சபையில் வைத்து வன்மையாக மறுத்துள்ளதுடன், அவருக்குப் பகிரங்க சவாலொன்றையும் விடுத்துள்ளார்.
‘விட்ஸ்’ (Vitz) ரக கார் ஒன்று 1.2 மில்லியன் ரூபாய் (12 இலட்சம் ரூபா) போன்ற மிகக் குறைந்த விலைக்கு விற்பனை செய்யப்படுவதாகப் பிரதி அமைச்சர் நலின் ஹேவகே கூறியதாக, எதிர்க்கட்சித் தலைவர் சஜித் பிரேமதாச நாடாளுமன்றில் குற்றஞ்சாட்டியிருந்தார்.
இதற்குச் சபையில் உரையாற்றியபோது பதிலளித்த பிரதி அமைச்சர் நலின் ஹேவகே,
“விட்ஸ் கார் ஒன்று 1.2 மில்லியன் ரூபாவிற்கு விற்கப்படுவதாக நான் எங்கேனும் அறிக்கை விட்டிருந்தால் அல்லது அவ்வாறு கூறியிருந்தால், அதனை இந்தச் சபையில் உத்தியோகபூர்வமாக நிரூபிக்குமாறு எதிர்க்கட்சித் தலைவருக்குக் சவால் விடுக்கின்றேன். அவர் அதனை நிரூபித்தால் நான் எனது பதவியை உடனடியாக ராஜினாமா செய்கிறேன். ஆனால், அவரால் அதனை நிரூபிக்க முடியாவிட்டால், தவறான தகவலைச் சபைக்கு வழங்கியதற்காக எதிர்க்கட்சித் தலைவர் சஜித் பிரேமதாச தனது பதவியை ராஜினாமா செய்ய வேண்டும்” என்று குறிப்பிட்டார்.
நாடாளுமன்றத்தில் எதிர்க்கட்சியினர் திட்டமிட்டுப் பொய்ப் பிரசாரங்களை எமது அரசாங்கத்திற்கு எதிராகப் பரப்பி வருவதாகக் குற்றம் சாட்டிய அவர், நுகர்வோர் சந்தை நிலவரம் குறித்து அவ்வாறான எந்தவொரு கருத்தையும் தான் எப்போதும் கூறவில்லை என்றும் சபையில் மிக உறுதியாக வலியுறுத்தினார்.
