கிளிநொச்சி – தர்மபுரம் பொலிஸ் பிரிவுக்குட்பட்ட பிரமந்தனாறு பகுதியில், சட்டவிரோதமான முறையில் அரச காட்டுக்குள் அத்துமீறி நுழைந்து, எந்தவித உத்தியோகபூர்வ அனுமதிப் பத்திரமுமின்றிப் பெறுமதிமிக்க முதிரை மரக்குற்றிகளை வெட்டிக் கடத்த முயன்ற சந்தேக நபர் ஒருவர் அதிரடியாகக் கைது செய்யப்பட்டுள்ளார்.
தர்மபுரம் பொலிஸாருக்குக் கிடைக்கப்பெற்ற நம்பகமான இரகசியத் தகவலுக்கமைய, சம்பவ இடத்திற்கு விரைந்து சென்ற பொலிஸ் குழுவினர், முதிரை மரக்குற்றிகளை வேறொரு பகுதிக்குக் கடத்திச் செல்வதற்காகக் ‘கப்’ (Cab) ரக வாகனத்தில் ஏற்றிக்கொண்டிருந்த போதே சந்தேக நபரை மடக்கிப் பிடித்துள்ளனர்.
இதன்போது கடத்தலுக்குப் பயன்படுத்தப்பட்ட ‘கப்’ ரக வாகனமும், அதிலிருந்த பெருமளவிலான முதிரை மரக்குற்றிகளும் பொலிஸாரால் உத்தியோகபூர்வமாகக் கைப்பற்றப்பட்டுள்ளன.
கைது செய்யப்பட்ட சந்தேக நபரை இன்றைய தினம் (22) கிளிநொச்சி நீதவான் நீதிமன்றத்தில் முற்படுத்துவதற்கும், கைப்பற்றப்பட்ட மரக்குற்றிகளை நீதிமன்றில் சான்றுப் பொருட்களாக ஒப்படைப்பதற்கும் தேவையான சட்ட நடவடிக்கைகள் எடுக்கப்பட்டுள்ளதாகத் தர்மபுரம் பொலிஸ் நிலையப் பொறுப்பதிகாரி (OIC) தெரிவித்துள்ளார்.
இக்கடத்தல் பின்னணியில் வேறு எவருக்கும் தொடர்புள்ளதா என்பது குறித்துப் பொலிஸார் மேலதிகப் புலனாய்வு விசாரணைகளை மேற்கொண்டு வருகின்றனர்.
