கனடாவின் பிரிட்டிஷ் கொலம்பியா மாகாணத்தில் உள்ள கிட்டிமட் நகரில், வரவிருக்கும் நகராட்சித் தேர்தலை முன்னிட்டு வித்தியாசமான மற்றும் சுவாரஸ்யமான முயற்சி ஒன்று கவனம் ஈர்த்துள்ளது. மனிதர்களுக்கான மேயர் தேர்தலுடன் இணைந்து, ‘நாய் மேயர்’ ஒருவரைத் தேர்ந்தெடுக்கும் சிறப்பு தேர்தலும் நடத்தப்படவுள்ளது.
இந்த தேர்தலில் கஸ் மற்றும் கோகோ என்ற இரண்டு செல்ல நாய்கள் போட்டியிடுகின்றன. இரு நாய்களும் தனித்தனி பிரச்சார நடவடிக்கைகளில் ஈடுபட்டு, பொதுமக்கள் மற்றும் மாணவர்களின் கவனத்தை ஈர்த்து வருகின்றன.
நகராட்சி அதிகாரிகளின் தகவலின்படி, இந்த முயற்சியின் பிரதான நோக்கம் தேர்தல் மீதான பொதுமக்களின் ஆர்வத்தை அதிகரிப்பதும், குறிப்பாக இளைஞர்கள் மற்றும் மாணவர்களிடையே உள்ளூர் ஆட்சி தொடர்பான விழிப்புணர்வை ஏற்படுத்துவதுமாகும்.
கடந்த 2022ஆம் ஆண்டு நடைபெற்ற நகராட்சித் தேர்தலில் தகுதியுடைய வாக்காளர்களில் சுமார் 21.7 சதவீதத்தினர் மட்டுமே வாக்களித்திருந்தனர். இதனால் குறைந்த வாக்காளர் பங்கேற்பை மாற்றும் வகையில் இந்த புதுமையான திட்டம் அறிமுகப்படுத்தப்பட்டுள்ளது.
தற்போது கஸ் மற்றும் கோகோ ஆகிய நாய்களுடன் நகராட்சி அதிகாரிகள் பாடசாலைகளுக்குச் சென்று, மேயர் மற்றும் நகரசபை உறுப்பினர்களின் பொறுப்புகள், நகராட்சி நிர்வாகத்தின் செயற்பாடுகள் மற்றும் ஜனநாயகத்தின் முக்கியத்துவம் குறித்து மாணவர்களுக்கு எளிமையாகவும் சுவாரஸ்யமாகவும் விளக்கி வருகின்றனர்.
மேலும், கனடா தின அணிவகுப்பு உள்ளிட்ட பல்வேறு சமூக நிகழ்வுகளிலும் இந்த நாய் வேட்பாளர்கள் பங்கேற்கவுள்ளதாக தெரிவிக்கப்பட்டுள்ளது.
இந்த முயற்சி, தேர்தலை வெறும் அரசியல் நிகழ்வாக அல்லாமல், சமூகக் கல்வி மற்றும் ஜனநாயக விழிப்புணர்வை ஊக்குவிக்கும் ஒரு மகிழ்ச்சிகரமான நிகழ்வாக மாற்றியமைத்துள்ளதுடன், உலகளாவிய கவனத்தையும் பெற்றுள்ளது.
