புத்தளம் கங்கேவாடிய மற்றும் சேரக்குளிய கடற்கரைப் பகுதிகளில் கடற்படையினர் மேற்கொண்ட விசேட தேடுதல் நடவடிக்கையில், சட்டவிரோதமாக நாட்டுக்குள் கொண்டுவரப்பட்ட 821 கிலோகிராம் பீடி இலைகள் கைப்பற்றப்பட்டுள்ளன.
நேற்று (21) இரவு மேற்கொள்ளப்பட்ட இந்த நடவடிக்கையில், பீடி இலைகளை ஏற்றிச் சென்ற டிங்கி படகொன்றில் இருந்த இரு சந்தேகநபர்கள் கைது செய்யப்பட்டுள்ளனர்.
கங்கேவாடிய இப்பன்தீவு கலப்புப் பகுதியில் மேற்கொள்ளப்பட்ட சோதனையில், 10 பீடி இலை மூட்டைகளுடன் குறித்த டிங்கி படகும், கற்பிட்டி – ஆனவாசலை பகுதியைச் சேர்ந்த 35 மற்றும் 36 வயதுடைய இரு சந்தேகநபர்களும் கடற்படையினரால் கைப்பற்றப்பட்டனர்.
இதனைத் தொடர்ந்து சேரக்குளிய கடற்கரைப் பகுதியில் மேற்கொள்ளப்பட்ட தேடுதலில், கடத்தல்காரர்களால் கைவிடப்பட்ட நிலையில் மேலும் 12 பீடி இலை மூட்டைகளுடன் மற்றுமொரு டிங்கி படகும் கைப்பற்றப்பட்டது.
கைப்பற்றப்பட்ட பீடி இலைகள், இரண்டு டிங்கி படகுகள் மற்றும் சந்தேகநபர்கள் மேலதிக சட்ட நடவடிக்கைகளுக்காக புத்தளம் மதுவரித் திணைக்கள அலுவலகத்தில் ஒப்படைக்கப்பட்டுள்ளனர்.
