அமரர் திலீபனின் 39ஆம் ஆண்டு நினைவேந்தல் நிகழ்வுகள் இன்று (26) மட்டக்களப்பு காந்தி பூங்காவில் இரு இடங்களில் இடம்பெற்றன.
காந்தி பூங்காவில் அமைந்துள்ள படுகொலை செய்யப்பட்ட ஊடகவியலாளர்களின் நினைவுத்தூபிக்கு முன்பாக தமிழ் மக்கள் பேரவையின் ஏற்பாட்டிலும், மகாத்மா காந்தியின் உருவச்சிலைக்கு அருகில் மட்டக்களப்பு மாநகரசபை மற்றும் சிவில் சமூக அமைப்புகளின் ஏற்பாட்டிலும் நினைவேந்தல் நிகழ்வுகள் நடைபெற்றன.
படுகொலை செய்யப்பட்ட ஊடகவியலாளர்களின் நினைவுத்தூபிக்கு முன்பாக நடைபெற்ற நிகழ்வு தமிழ் தேசிய மக்கள் முன்னணியின் தேசிய அமைப்பாளர் தர்மலிங்கம் சுரேஸ் தலைமையில் இடம்பெற்றது. இதில் முன்னாள் பாராளுமன்ற உறுப்பினர் பா.அரியநேத்திரன், முன்னாள் கிழக்கு மாகாணசபை உறுப்பினர் மா.நடராசா, மட்டக்களப்பு மாவட்ட வலிந்து காணாமல் ஆக்கப்பட்ட உறவுகள் சங்கத்தின் தலைவி அ.அமலநாயகி உள்ளிட்ட பலர் கலந்துகொண்டனர்.
இதன்போது அமரர் திலீபனின் திருவுருவப்படத்திற்கு மலர் மாலை அணிவிக்கப்பட்டு, தீபச்சுடர் ஏற்றப்பட்டதுடன் மௌன அஞ்சலியும் செலுத்தப்பட்டது. தொடர்ந்து நினைவுப்பேருரையும் இடம்பெற்றது.
இதேவேளை, காந்தி சிலைக்கு அருகில் மட்டக்களப்பு மாநகரசபை மற்றும் மட்டக்களப்பு மாவட்ட சிவில் சமூக அமைப்புகள் இணைந்து நினைவேந்தல் நிகழ்வை ஏற்பாடு செய்திருந்தன. மாநகரசபை முதல்வர் சிவம்பாக்கியநாதன் தலைமையில் நடைபெற்ற இந்நிகழ்வில் பாராளுமன்ற உறுப்பினர்களான ஞா.ஸ்ரீநேசன், இ.சிறிநாத் உள்ளிட்ட பலர் கலந்துகொண்டனர்.
முன்னாள் பாராளுமன்ற உறுப்பினர் பா.அரியநேத்திரன், முன்னாள் கிழக்கு மாகாணசபை உறுப்பினர் மா.நடராசா, முன்னாள் மாநகர முதல்வர் சரவணபவன், மாநகரசபை உறுப்பினர்கள், பிரதேச சபை தவிசாளர்கள், தமிழரசுக் கட்சி உறுப்பினர்கள், சிவில் சமூக செயற்பாட்டாளர்கள் மற்றும் வலிந்து காணாமல் ஆக்கப்பட்ட உறவுகளின் சங்க பிரதிநிதிகள் உள்ளிட்டோரும் இதில் பங்கேற்றனர்.
1987ஆம் ஆண்டு செப்டெம்பர் 15ஆம் திகதி ஐந்து அம்சக் கோரிக்கைகளை முன்வைத்து திலீபன் உண்ணாவிரதப் போராட்டத்தை ஆரம்பித்திருந்தார். 1987ஆம் ஆண்டு செப்டெம்பர் 26ஆம் திகதி காலை 10.48 மணியளவில் அவர் உயிரிழந்ததாக தெரிவிக்கப்படுகிறது.
இந்நிலையில், ஒரே இடத்தில் இரு தனித்தனி நினைவேந்தல் நிகழ்வுகள் இடம்பெற்றமை தொடர்பில் பல்வேறு கருத்துகள் முன்வைக்கப்பட்டுள்ளன.
