பதுளை மாவட்டத்தின் ஊவபரணகம பிரதேச செயலாளர் பிரிவுக்குட்பட்ட அலகொல்லை தோட்டத்தில், மண்சரிவு அதி உயர் அபாய வலயத்தில் வாழ்ந்து வந்த 51 குடும்பங்களுக்கு புதிய வீடுகள் நிர்மாணிக்கப்படவுள்ளன.
இந்திய அரசாங்கத்தின் உதவியுடனும் இலங்கை அரசாங்கத்தின் அனுசரணையுடனும் முன்னெடுக்கப்படும் இந்திய வீட்டுத் திட்டத்தின் நான்காம் கட்ட 10,000 வீடுகள் வேலைத்திட்டத்தின் கீழ் இந்த வீடுகள் நிர்மாணிக்கப்படவுள்ளன.
இதற்கான அடிக்கல் நாட்டும் நிகழ்வு நாளை (29) காலை 9 மணிக்கு நடைபெறவுள்ளது. பெருந்தோட்ட மற்றும் சமூக உட்கட்டமைப்பு வசதிகள் அமைச்சர் சமந்த வித்தியாரத்ன மற்றும் பிரதி அமைச்சர் சுந்தரலிங்கம் பிரதீப் ஆகியோரின் தலைமையில் நடைபெறும் நிகழ்வில் இலங்கைக்கான இந்திய உயர்ஸ்தானிகராலயத்தின் பிரதிநிதிகளும் கலந்துகொள்ளவுள்ளனர்.
மண்சரிவு அபாயம் காரணமாக 13 வருடங்களுக்கும் மேலாக பாதுகாப்பற்ற சூழ்நிலையில் வாழ்ந்து வந்த 51 குடும்பங்களுக்கும் பாதுகாப்பான மற்றும் கௌரவமான வீட்டு வசதிகளை வழங்குவதே இத்திட்டத்தின் நோக்கமாகும்.
ஒரு வீட்டுக்கு இந்திய அரசாங்கம் 28 இலட்சம் ரூபாவும், மேலதிக உட்கட்டமைப்பு வசதிகளுக்காக இலங்கை அரசாங்கம் 4 இலட்சம் ரூபாவும் நிதி ஒதுக்கீடு செய்துள்ளதாக தெரிவிக்கப்பட்டுள்ளது. இதன்படி, ஒவ்வொரு வீட்டிற்கும் மொத்தமாக 32 இலட்சம் ரூபா பெறுமதியில் நிதி ஒதுக்கப்பட்டுள்ளது.
