தேர்தல் காலங்களில் தமக்கு எதிராக முன்னெடுக்கப்படும் சேறடிப்பு பிரசாரங்கள், இம்முறை தேர்தலுக்கு முன்பாகவே ஆரம்பிக்கப்பட்டுள்ளதாக முன்னாள் அமைச்சர் டக்ளஸ் தேவானந்தா தெரிவித்துள்ளார்.
யாழ்ப்பாணத்தில் உள்ள தனது கட்சியின் தலைமை அலுவலகத்தில் நடைபெற்ற ஊடகவியலாளர் சந்திப்பில் சமகால அரசியல் நிலவரங்கள் தொடர்பில் கருத்துத் தெரிவிக்கும்போதே அவர் இதனைக் குறிப்பிட்டுள்ளார்.
இதன்போது மேலும் கருத்துத் தெரிவித்த அவர், அரசியல் ரீதியாகத் தம்மைப் பலவீனப்படுத்தும் நோக்கில் சில பத்திரிகைகள் அவ்வப்போது தவறான தகவல்களை வெளியிட்டு வருவதாகக் குற்றஞ்சாட்டினார்.
குறிப்பாக, தீவகத்தில் இடம்பெற்ற படுகொலைகள் தொடர்பாக விசாரணைகள் முன்னெடுக்கப்படுவதாகவும், பயங்கரவாத தடுப்புப் பிரிவினர் தமது அலுவலகத்திற்குச் சென்றதாகவும் அண்மையில் வெளியான செய்திகளில் குறிப்பிடப்பட்டிருந்ததாகவும், அவ்வாறான விசாரணைகள் எதுவும் இடம்பெறவில்லை என்றும் அவர் தெரிவித்தார்.
சமூக மற்றும் கூட்டு மையத்தின் நிறைவேற்றுப் பணிப்பாளர் அருட்தந்தை ரண்முனி ஜீட் வர்ணன் றொஹான் சில்வா என்பவர் அசாத் மௌலானா சனல் 4 தொலைக்காட்சிக்கு வழங்கிய நேர்காணலில் தெரிவிக்கப்பட்ட விடயங்களின் உண்மைத்தன்மையை உறுதிப்படுத்துமாறு குற்றப் புலனாய்வுப் பிரிவில் முறைப்பாடு செய்துள்ளதாகவும் அவர் குறிப்பிட்டார்.
அந்த முறைப்பாட்டின் அடிப்படையில், அசாத் மௌலானா தன்னுடன் தொடர்பு இருந்ததாகத் தெரிவித்தமை தொடர்பில் வாக்குமூலம் வழங்குவதற்காகவே தான் அழைக்கப்பட்டதாகவும் டக்ளஸ் தேவானந்தா தெரிவித்தார்.
இவ்விடயம் தொடர்பில் உறுதிப்படுத்தப்படாத தகவல்களை அடிப்படையாகக் கொண்டு செய்தி வெளியிட்ட சில பத்திரிகைகள், தமக்குக் களங்கம் ஏற்படுத்தி அரசியல் ரீதியாகப் பலவீனப்படுத்தும் வழக்கமான முயற்சியில் ஈடுபட்டுள்ளதாகவும் அவர் குற்றஞ்சாட்டினார்.
