மட்டக்களப்பில் ஆசிரியர் தினத்தை பாடசாலையில் கொண்டாடிவிட்டு அதிபருடன் மோட்டார் சைக்கிளில் வீடு திரும்பிய ஆசிரியை ஒருவர் கனரக வாகனம் மோதி விபத்துக்குள்ளானதில் சம்பவ இடத்திலேயே உயிரிழந்துள்ளதுடன், பாடசாலை அதிபர் படுகாயமடைந்த நிலையில் வைத்தியசாலையில் அனுமதிக்கப்பட்டுள்ளார்.
இந்த விபத்து இன்று செவ்வாய்க்கிழமை (06) மட்டக்களப்பு திமிலைதீவு எரிபொருள் நிரப்பு நிலையத்திற்கு முன்பாக இடம்பெற்றுள்ளது.
மட்டக்களப்பு நகர் சூரியா வீதியைச் சேர்ந்த 58 வயதுடைய கமலநாதன் மதிவதனி என்ற ஆசிரியையே இவ்வாறு உயிரிழந்துள்ளார். இவர் வலையிறவு த.க. பாடசாலையில் ஆசிரியராக கடமையாற்றி வந்துள்ளார்.
ஆசிரியர் தினத்தையொட்டி பாடசாலையில் நடைபெற்ற நிகழ்வுகளில் கலந்துகொண்ட பின்னர், பிற்பகல் 1.30 மணியளவில் பாடசாலை அதிபரின் மோட்டார் சைக்கிளில் பின்னால் அமர்ந்து வீட்டிற்கு பயணித்துள்ளார்.
இதன்போது, திமிலைதீவு எரிபொருள் நிரப்பு நிலையத்திற்கு முன்பாக பின்னால் வந்த கனரக வாகனம் மோட்டார் சைக்கிளை மோதியதில் இருவரும் வீதியில் விழுந்துள்ளனர். இதன்போது ஆசிரியை மீது கனரக வாகனம் ஏறியதில் அவர் சம்பவ இடத்திலேயே உயிரிழந்துள்ளார்.
விபத்தில் படுகாயமடைந்த அதிபர் மட்டக்களப்பு போதனா வைத்தியசாலையில் அனுமதிக்கப்பட்டுள்ளார்.
விபத்தை ஏற்படுத்திய கனரக வாகனத்தின் சாரதி, வாகனத்தை சம்பவ இடத்திலேயே விட்டுவிட்டு தப்பிச் சென்றுள்ளார். இதையடுத்து அப்பகுதியில் பொதுமக்கள் ஒன்று திரண்டதால் பதற்றமான நிலை ஏற்பட்டது.
சம்பவ இடத்துக்கு விரைந்த பொலிஸார் கனரக வாகனத்தை மீட்டு எடுத்துச் சென்றனர்.
இதனையடுத்து மட்டக்களப்பு நீதவான் நீதிமன்ற நீதவான் சம்பவ இடத்துக்குச் சென்று விசாரணைகளை மேற்கொண்டதுடன், உயிரிழந்த ஆசிரியையின் சடலத்தை பிரேத பரிசோதனைக்கு உட்படுத்துமாறு உத்தரவிட்டார். பின்னர் சடலம் மட்டக்களப்பு போதனா வைத்தியசாலை பிரேத அறையில் வைக்கப்பட்டுள்ளது.
சம்பவம் தொடர்பான மேலதிக விசாரணைகளை மட்டக்களப்பு தலைமையக போக்குவரத்து பொலிஸார் மேற்கொண்டு வருகின்றனர்.
